بقالى كتير مكتبتش .. بس من عادتى انى اصلا مبكتبش غير لما ببقى على وشك الانفجار.. والنهاردة انا لا بكتب مقال ولا بكتب رأي ولا بذكر تاريخ قريته ... ولكن هي مجموعة من المهاترات النفسية اللى تمخضت وولدت على الحالة المقرفة لبلدنا المقرفة
قبل ما اكتب اي حاجة لما بدات اكتب الكلام افتكرت كلمة عبد الرحمن الابنودى فى قصيدته (واحنا ولاد الكلب الشعب) وحسيت معنى الكلام لأول مرة فعلاً
كم أنت رائع يا أبنودى
كل من على الساحة المصرية بكل الانتماءات الفكرية والايدلوجيات والوسائل والمؤسسات فلقتوا وقرفتوا اهلى
هو ايه سبب فشل الثورة الاول
الإخوان - 6 إبريل - الدستور - البرادعى - الليبراليين - العلمانيين - السلفيين - المسيحيين - اليساريين - تمرد
حمرا يعنى حمرا بجد البوستات بقت تخنق والفيس بقى يخنق من كتر القرف اللى فيه
هو سبب فشل الثورة
30 يونيو ... يعنى هى الثورة مفشلتش غير بعد 30 يونيو
الا بالحق على مدار 3 سنين
فاكرين الاحداث ولا مش فاكرين ؟؟؟
1- فض إعتصام التحرير 25 يناير 2011 الساعة 12 بالليل
2- نزول الجيش يوم 28 يناير 2011 الى الشوارع
3- موقعة الجمل بتأمين قوات الجيش والحرس الجمهورى لدخول البلطجية 2 فبراير 2011
4- تنحى مبارك 11 فبراير 2011
5- فض اعتصام التحرير يوم 28 فبراير 2011
6- فى يوم 2 مارس 2011 إعلان الاستفتاء على تعديل الدستور المصري في يوم 19 مارس 2011
7- فى يوم 3 مارس 2011 نتيجة للاعتصام الشديد ضد الفريق أحمد شفيق. تقدم أحمد شفيق باستقالته من منصب رئيس الوزراء وتسلم المنصب الدكتور عصام شرف
8- فى يوم 4 مارس 2011 اقتحام المتظاهرين لمبانى أمن الدولة
9- فض اعتصام التحرير يوم 9 مارس وكشوفات العذرية
10- استفتاء 19 مارس 2011 على التعديلات الدستورية بأغلبية 77 % نعم
11- فض اعتصام ضباط 8 إبريل 2011 بالتحرير
12- ثورة الغضب المصرية الثانية 27 مايو 2011
13- أحداث مسرح البالون فى 28 يونيو 2011
14- إعتصام 8 يوليو 2011
15- مسيرة 6 إبريل إلى وزارة الدفاع 23 يوليو 2011
16 - بيان المجلس العسكرى بخصوص 6 إبريل يوم 23 يوليو 2011
17- فض إعتصام 8 يوليو يوم 1 أغسطس 2011 الموافق 1 رمضان
18- مسيرة لطرد السفير الإسرائيلى 9 سبتمبر 2011
19- أحداث ماسبيرو 4 أكتوبر
20- إعتصام 18 نوفمبر 2011 لرفض وثيقة على السلمى
21- فض إعتصام 18 نوفمبر من قبل الداخلية وبداية أحداث محمد محمود يوم 19 نوفمبر 2011
22- فض إعتصام محمد محمود من قبل الشرطة العسكرية 20 نوفمبر 2011 ورمي الجثث فى الزبالة
23- 16 ديسمبر 2011 أحداث مجلس الوزراء
24- 25 يناير 2012 مسيرات تجوب الجمهورية لإسقاط حكم العسكر
25- 1 فبراير 2012 مجزرة بورسعيد
26- انتخابات الجولة الأولى للرئاسة فى 23 و24 مايو 2012
27- انتخابات الإعادة فى 16 و17 يونيو 2012
28- محمد مرسى رئيس للجمهورية 30 يونيو 2012
وطب بعد ما محمد مرسى مسك
دم حد من الناس اللى ماتت فى الاحداث دى جه
لما طلبنا محاكمات ثورية واتقالنا لازم القانون ياخد مجراه
طب بلاش دي ... من اول يوم بعد 11 فبراير واحنا بنعمل ايه
طب الاتحادية واحداثها ولا محمد محمود واحداثه
طب احداث المقطم
طب احداث ولاد الكلب
طب اي احداث
خلينا نلف فى ام الدايرة المغلقة ... خلينا رد فعل على طول ... يلبسونا العمة فننزل نعترض فنموت ونهدى ونقعد وبعدين ننزل تانى
كل الاطراف على الساحة بجد زبالة وزبالة الزبالة
من اخوان لسلفيين لليبراليين ليساريين لحركات شبابية
كله ابن كلب
لازم يكون عندنا اعتراف ابن ستين كلب نفهمه اننا ولاد كلب كلنا
الاعتراف بالحق فضيلة
اعترافك بخطأك فضيلة مش عيب والله
كفاية مزايدة وقرف وهطل وتخلف بقى ... كفاية كفرتونا
وفى النهاية
اسمع يا ابن الشعب حكايتك
أصل شكايتى هي شكايتك
عشت سنين مش لاقى العيش
حرية وكرامة مفيش
فى الاقسام كان التعذيب
واسال عنه الكلب حبيب
هب شباب الثورة وقال
مصر بلدنا فيها رجال
ثورتنا كانت فى يناير
حيوا صمود الشعب الثاير
قولنا الثورة ميعادها خلاص
قاموا واجهونا بالرصاص
فصمدنا وسط الميدان
ومبارك راح اللومان
قولنا بلدنا تعيش وتروق
بس يا صاحبى اخدنا خازوق
مات اصحابنا مات اخواتنا
والنخبة سرقت ثورتنا (توضيح النخبة بكل ائتلافاتها واحزابها وجماعتها وحركاتها)
قالوا يا شبابنا شيلوا ايديكو
مصر بلدنا كبيرة عليكو
فضل العسكر هو الحاكم
والعسكر لازم يتحاكم
عيشنا فى ذل وازمات
نسانا كل اللى فات
حرق وقتل وفوضى كمان
بلطجية فى كل مكان
مجلس شعب من الطراطير
ولا فيه حل ولا فيه تغيير
قال الناس من كتر الجوع
فين أيامك يا مخلوع
فنزلنا تانى الميدان
قولنا كفاية عليك يا جبان
سلم ام السلطة وغور
لاما عليك برده هنثور
وهتفنا من جوه الازهر
يسقط يسقط حكم العسكر
واشهد يا محمد محمود
كانوا ديابة وكنا اسود
وبعد ما سال دم اللى مات
بالعافية عمل انتخابات
اتاريه بيتكتك من تانى
لإما الفل او الاخوانى
اما مرسى واما شفيق
حسيت الدنيا بتضيق
مش قولت انتخابات وتروق
البس تانى احلى خازوق
ساعتها عرفت انى حمار
والعسكر لبسنى حوار
بس رجعت وقولت لعل
خلينى اتفرج واتسلى
فجاة لقيت الدنيا سواد
مش شايف الريس يا ولاد
رحت افوق نفسى بمية
خذلتنى والله الحنفية
طب قولى فى الاعلام
مين بيفشل فى النظام
الاقيه بيمجد فى الشرطة
والعسكر حلوين والسطة
تبقى الازمة جاية منين
اتشال مرسى بعد يومين
فجأة اتحلت كل حاجة
أصل الأزمة مش محتاجة
بقت الدنيا قشطة وفل
ده العسكر بيلاعب الكل
شال مندوبه وجاب طرطور
قال ايه هيحكمنا منصور
وبرده هيرجع يعمل ازمة
اصل دى عادة ابن الجزمة
علشان ننزل تانى نقول
عاش العسكر والفلول
هاتوا مبارك هاتوا حبيبب
انا بعشق طعم التعذيب
انا عايز فى القسم اتهان
مش هرجع تانى الميدان
انا عايز احيا فى الزحمة
انا كاره للعيش واللحمة
ماله الفول وماله الكشرى
احسن من منصور الكشرى
لو مش ناوى دلوقتى تفوق
يبقى هتلبس تانى خازوق
وهى دولة العواجيز
الفساد جوه الدهاليز
فيها الشعب هيفضل لعبة
يلبعها العسكر والنخبة (توضيح برده النخبة بكل ائتلافاتها واحزابها وجماعتها وحركاتها)
اوعى تسلم ليهم واصبر
بكرة ربى وربك ينصر
ده فيديو للقصيدة اللى فوق دى
http://www.youtube.com/watch?v=4ZARt4CTl6c
كلمة هقولها (متحدين نقف متفرقين نسقط)
يا رب الناس تفهم :/
على رزق
21/8/2013
