الخميس، 22 نوفمبر 2012

حملة التدوين الأسبوعى :: ثوار أحرار هنكمل المشوار


تمر الأيام يومًا بعد يوم ويتزايد سؤالنا هل سنشعر بأن للمواطن المصرى ودمه كرامة وحرمة أم أنها مجرد تكهنات وأمنيات لا تتحقق.
قمنا بثورة نهتف فى مسيراتها وفى شوارع بلادنا "عيش-حرية-كرامة إنسانية". "تغيير-حرية-عدالة إجتماعية". فأين العيش والحرية والكرامة الإنسانية هل هي شعارات انتهى زمانها وولت منذ زمن وحُكم على هذه الأمة أن تظل فى قاع الأمم. عندما وصلنا إلى الإعادة ما بين مرسى وشفيق الكثير من شباب الثورة وكثير من الأهالى الداعمين للثورة قرروا إختيار مرسى رئيسًا أملاً فى أن يكون طوق نجاة لهذه الثورة كما يحلمون. وتردد وقتها كثير من تلك العبارات والكلمات "أُعصر على نفسك لمونة وإنزل إنتخبه". فكانت نتيجة الانتخابات بفوز محمد مرسى.
لا يجوز كما يقال فى العرف السياسي أن تحكم على رئيس لم يكمل من توليه الحكم نصف العام بعد. ولكن هناك بوادر حكم. لم يخرج علينا مرسى ليوضح لنا جدولاً زمنيًا ورؤية لأعوامه بل إن وعوده حتى لم ينفذ منها شيئًا ... وتسير حكومته متخبطة وبخطوات متثاقلة تذكرنا بالحكومات الانتقالية لعصام شرف وكمال الجنزورى. وكأننا سنعيش عصر الحكومات الإنتقالية المتعاقبة. إهمال حكومى لكل شىء فى الدولة من أمن وعيش وحرية وصناعة وزراعة وما إلى غيره. فيكون نتيجة الإهمال قطر الموت وطريق تعليم نهايته الموت فى أسيوط فقتل قطر الإهمال واللامبالاة لهذه الدولة 60 طفلاً من مستقبل بلادنا. ثم تتجدد الأرقام فى الحوادث على الطرق ليصل من ماتوا فى هذا اليوم المشئوم 169 مواطن مصرى. بعد يومين تأتى ذكرى أحداث محمد محمود لنجد المشهد يتكرر مرة ثانية وتسيل دماء جديدة على يد من هم بالمفترض حماة الوطن. تتجدد الإصابات ويسقط شهداء جدد كان أولهم جابر صلاح "شاب بالثانوية العامة" ليخرج علينا بعض العقول لتردد علينا كلمات ليست بالجديدة وإنما هى كلمات لطالما سمعناها على مدار العامين المنصرمين "هؤلاء مأجورون..هؤلاء هم بلطجية..ماذا يريدون؟" فالضحية شاب لم يصل للحرم الجامعى بعد. والمقبوض عليهم شباب فى مقتبل العمر فى مراحل تعليمية مختلفة من تعليم أساسي لتعليم متوسط " الثانوية العامة " لتعليم جامعى ولا تزال تلك الأفواه تطلق علينا صفيرًا موحدًا " أوقفوا نزيف الوطن .. هؤلاء البلطجية والقتلة .. هؤلاء يريدون زعزعة الإستقرار وحرق مقدرات الوطن ".
تبًا لكل تلك الأفواه وتبًا لكل تلك العقول. سئمنا تعليقاتكم وآرائكم لم كل من يسقط شهيدًا نجده طالبًا او شيخًا او عالما او مهندس او دكتور. هل مستقبل هذا البلد الذين يسقطون يومًا بعد يوم هم بلطجية وعملاء يريدون دحر وقتل مقدرات الوطن.
تبًا لكم آلاف المرات. سنظل نرددها "ثوار أحرار هنكمل المشوار" وسنظل نردد "عيش-حرية-كرامة إنسانية" ونردد "يا شهيد نام واتهنى..واستنانا على باب الجنة" "القصاص القصاص قتلوا اخواتنا بالرصاص" و "الشهدا قالوها خلاص..اتعلمنا اللأه خلاص"
وفى نهاية تلك التدوينة أدعو لكل شهداء الشعوب التى قامت من أجل الكرامة الإنسانية. أدعو لشهداء سوريا ومصر وليبيا وتونس واليمن وكل الربيع العربى
وأقتبس كلمات من أغنية لفرقة اسكندريلا" شهدا يغنوا وشهدا يطيروا..شهدا اعتصموا وشهدا شهود..شهداء بيجوا من ماسبيرو ويزوروا محمد محمود ".

على رزق
22/11/2012 

الاثنين، 19 نوفمبر 2012

أحبك يا بلادى أحبك يا مصر




طويت ذكرياتى و احزانى
ونظرت أمامى

فجمعت شتات اركانى 
وبدأت فى تحقيق احلامى

و اتخذت خطواتىوشعرت
بمستقبل مشرق امامى
 
فرجعت الى تاريخ وامجاد اجدادى
و منها استمد قوتى
واشعر بكيانى 
وحبى لوطنى مصر
فبحبها اصبر على طول ايامى


 رباعياتى
على رزق
19/11/2012

هم ملايين



تلك القصيدة كتبتها بالتحديد فى 6 ديسمبر عام 2010م أصف بها حالنا نحن شعوب العرب وكم التخاذل تجاه القضية الفلسطينية والقدس ولم أنشرها ولكن بعد الربيع العربى وبعد العدوان الصهيونى الايام السابقة قررت نشرها لأن حال الشعوب العربية لم يتغير بالكثير بعد الربيع العربى..أرجو أن تنال إعجابكم 


قمنا نقول فى الانتفاضة

يا فلسطين يا فلسطين
وراسنا عليها
الوسخ والطين 

صوتنا مش مسموع

ما حكامنا نايمين 
عاملين فيها طرش
مش سامعين
مالهم هما بفلسطين
قولولي مالهم بفلسطين

ما هم فى قصور
عايشين 
يؤمروا وشعوبهم تقول آمين   

أبتدى منين وأقول لمين

مليش حد غير رب العالمين
أشكيله همى وهم ملايين
فى بلادهم زى المساجين
لا ينطقوا بكلمة حتى لو متهانين
تحت الرجول متداسين

حكام بيناموا شبعانين

على خير بلادهم مكوشين
وشعوبهم من الجوع ميتين
 وهما للبلد مخصخصين
ولخير بلادهم ناهبين

قتلوا الصدق والامانة

نشروا الرشوة والخيانة
دول ولا الشياطين

هما السادة واحنا العبيد

بلاد الكلمة فيها للقوي
أما الضعيف الفقير
تحت الرجلين

كل مسئول يلعب بينا 
شويتين
يقعد ع الكرسى ينهبلوا قرشين 

لا يهمه شباب على القهاوي مستنين

هيموتوا على شغل ومش لاقيين

ولا  مرضى فى مستشفى مترميين

ولا شعوب من فسادهم مظلومين 

ولا اللى على بره مهاجرين

شباب وبنات من بلادهم مطرودين 

سايبين البلد للبطجية والرقاصين

ممثل يطلع يتكلم فى الدين
ويوعظ وينصح .. على إنه دارس وشيخ أمين

وفنانة تتكلم ع الحجاب وتتريأ

ع المختمرين المنقبين المحجبين
اللى لعرضهم صاينين

ويقولوا ع الاعلام واللى ماسكينه

دول ادبا مثقفين
وهما لا يعرفوا الشمال من اليمين

عشان كورة يوقعوا بين أخين

ولنار الفتنة بينهم مشعللين
ويقولولك دول ادبا مثقفين

واحنا مكتومين ... واحنا مكتومين


الحزن والهم والدم .. 
والشقى شايلين
غلا وطوارىء فقر .. جهل تخلف شايفين

طب يعملوا ايه سعدواى ومحمدين

يشقوا وحق اللقمة مش لاقيين
ولا ع التعليم قادرين
وعلى طول راضيين
عن حقهم ساكتين..عن حقهم
وحق أولادهم وأولاد ولادهم
ساكتين

مش بقولكوا على راسنا

الوسخ والطين

وأما يتكلموا ع الشباب يقولوا

دول عصب البلد المتين
لازم يتعلموا احسن تعليم

وهما للعلما والأئمة طاردين

ولو اتنين فكروا يصلحوا بلدهم
ع السجون من غير محاكمة معتقلين

البلد بقت خلاص للشمامين

ورجال أعمال جزارين
بيعملوا فيها اللى هما عايزين 
ويزودوا المخدرات
ما عايزينا مغيبين 

عايشين متسلطنين متكيفين

ويوم بعد يوم يزودوا
فسادهم حبتين 

عايزينا نفضل تايهين

ما بين البومات المغنيين..
وأفلام الرقاصات والممثلين

لازم نفضل على طول غرقانين

واما نتكلم ونصرخ من الألم
لحالنا وحال البلد متسغربين

يقولوا انتوا لسه صغيرين

اسكتوا منتوش فاهمين
انتوا لسه صغيرين
أما هما
هما الكبار المتعلمين
المتنورين
اللى على طول فاهمين

لأ دول أكيد مجانين

نسيوا مجازر تمانية واربعين
نكسة سبعة وستين
قضية كل مسلم وكل عربى
نسيوا الشيخ رنتيسي والشيخ ياسين
واللى فى غزة ولبنان
القدس وعكا وحيفا شهدا وميتين
حاطين إيدهم في إيد
صهاينة ملاعين 
ع العالم مسيطرين
مالهم هما بفلسطين..قولولى مالهم هما بفلسطين

وقال ايه اسمهم عرب ومسلمين

وانهم دايمًا متجمعين
دول عمى بقى مش شايفين
انهم دايمًا مختلفين
ويقولولك خارطة الطريق 
وسلام لفلسطين
    
مش بقولكو على راسنا
الوسخ والطين

حكام خونة مرتشين

على كراسى الحكم متبتين
ع الجاه والسلطة خايفين

لسه حاجات كتير مقولنهاش

ما جالنا زهايمر وناسيين
ناسين حقوقنا واجباتنا حياتنا
عيالنا دينا حتى ربنا ناسين 
وإنا بين إيديه واقفين
وأكيد بالصورة دى
على جهنم رايحين
مش بقولكوا على راسنا
الوسخ والطين

فينك يا صلاح الدين

فينك يا جيش حطين
فينك يا ملك صالح

فينك يا نجم الدين

فينكم فينكم يا مسلمين   


على رزق
19/11/2012