أحد أقلام الماضى

بينما أقلب فى دفاترى القديمة وجدت قصيدة على الطريقة العامية كتبتها بعد انتخابات عام 2010 وبالتحديد يوم 15/1/2011 اي قبل ثورة الخامس والعشرين من يناير بعشرة أيام ويشاء القدير أن تقوم الثورة. كنت أؤمن وقتها بالتغيير وبأنه قادم لا محالة كما قال البوب د/ محمد البرادعى وكنت أؤمن أن من سيقود التغيير هم شباب هذا الجيل ... حتى لا أطيل عليكم أترككم مع بعض من كلماتى العامية التى أتمنى أن تلقى إعجابكم 

كارت إرهاب و بلطجة أيام الانتخاب

و عيشة هباب و يشتروك بأكلة كباب

مفيش عدل العدل هناك عند السحاب

و النجاح دايما للكلاب

اللى عايشين زي الدياب

و حياتك في يوم هيحصل انقلاب

هيرحلوك مش هتشوف حتى الشعاب

لا عندك فهم و لا استيعاب

عيب على شعرك اللى شاب

هيجى يوم تسيبه زى اللى ساب

كفاية بقى جبتلنا اكتئاب تزوير فى الانتخاب

و عيشتنا هباب و اللحمة بستين جنيه هتأكلنا بعد كده لحم كلاب

كاتم على نفسنا من زمان

لحد امتى العيل الصغير بينام جعان

و نلف و ندور مش عارفين نجيب حتى البتنجان

معندكش نخوة و لا ضمير ناسى اللى حصل فى غزة و لبنان

و لساك بتصدر الغاز هتفضل طول عمرك جبان

هنسكت لحد امتى على الظلم ساكتين عن حقوقنا

ما هم بالباطل واكلين قوتنا و مضيعين علينا حياتنا

و مزورين صوتنا و لاغيين ارادتنا

يلا بينا يا مصرى نرجع اللى مات

من مجد امتنا و ريادتنا فى العصر اللى فات

كفايانا قصص و حكايات

نرجع بايدنا اللى جوانا مات

نصحى ضميرنا نشتغل بهمة و ثبات

نبدأ بنفسنا يا ابن بلدى الحل فى ايدنا يا شباب المدارس و الجامعات 

على رزق 

15/1/2011