السبت، 7 أبريل 2012

فوق سطوحى

فوق سطوحى 

فوق سطوحى بكتب غنوتى 
عالشمس برسم بسمتى 
وفى نور القمر شايف امل 
عالصخر بحفر قصتى
بلهيب ثورتى بغسل ضميرى
واخفى دمعتى

انا مين !! ... انا مين !! 
انا الشاب انا المصرى
واقف عالرصيف 
مستنى آخد رغيف 
واعيش فى بيت نضيف 
انا اللى اتسحلت 
وبدم أخويا وصديقى كتبت
لأجل ما يكون المستقبل نضيف 
انا الخاين والعميل
انا المخرب وكل الكلام السخيف
انا اللى رامى همى وحلمى كله 
على الحق اللطيف
انا الشوكة فى حلق كل ظالم 
انا الشاب انا المصرى مش ضعيف

انا اللى صوتى هز النظام
انا اللى صرخت أقول لأ
وقت ما اتمنع الكلام
انا اللى رفضت اكون كالنعام
تتساق تاكل وتشرب فتنام
انا اللى كنت فى عز البرد
على الرصيف بنام
انا اللى مات اخويا وطارت عينى والسلام

انا الضمير الحى يحرس الوطن
كل حياتى عذاب فى ألم
عايش بالحنين والشجن
انا الغريب وسط بلدى
انا المعدوم اللى اتسجن

خلصت فى حبك كل الكلام
يا مصر يا بلدى يا بلد الامن والامان
امانة عليا لأفديكى بعنيا
لأجل ما تشوفى النور
وتنضفى من كل اللى خان
يا اجمل واحلى الاوطان

بكرة نعزف كل لحن وكل غنوة
وترقصى كيف الصبية
بكرة نيلك يحكى
يحكى قصة حبي ليكى يا بهية
بكرة نفتكر كل كلمة
وكل طلعة وكل قومة قوية
نفتكر كل لمة وصحبة حلوة
وأكلة بسيطة أكلناها سوا بشهية

بكرة نباركلك يا حلوة
بكرة نفرح يا حلوة بفرحك  وبنجاحك
وانتى عروسة بكرة
بكرة نفرح بشطارتك ونباهتك وانتصار الثورة

إهداء إلى كل مصرى إبريلى حر ... وإلى كل الشباب المصرى الثائر

على رزق "ابريلى وأفتخر"
6/4/2012

الثلاثاء، 3 أبريل 2012

مواطن فصيح

رغم تلك الاخبار المتوالية على الساحة والتى تثير الاحباط واليأس بداخلنا ونظن بأننا ندخل وثورتنا وحياتنا كلها فى متاهات.
أتوقع أن حلمى الشاغل حاليًا وحلم كل أصدقائى وزملائى وال Following و ال Followers على تويتر والاصدقاء على الفيس بوك هو هذه البلد وهمومها ومشاكلها اصبح حلمنا الشاغل فإن لم تنتصر ثورتنا ورؤيتنا لمصر المستقبل أننا سنموت إما مواجهة وإما إكتئابًا على ما يحدث الآن.

بينما انا جالس فى ميكروباص الزراعة اجد ذلك المواطن البسيط الفصيح الذى يعمل كعامل بشركة الكهرباء يتحدث عن حال هذه البلد ومساوىء ذلك الشعب وتلك الحكومة والكيانات المختلفة لفتنى بلاغته ورؤيته وفكره فى حديثه مع زميل آخر رغم عدم تعلمه " لا يقرأ ولا يكتب "


المواطن الفصيح :: والله يا اخى العالم دول كلهم جبانات.طالعين يعملوا اضراب واول ما المسئول يرميلهم جنيه ينكنوا تانى
الصديق :: اكل العيش مر يا صاحبى
المواطن الفصيح :: المبدأ مش بيتجزأ يا عم الحج .. انت بتطالب بحق والحق مفيهوش فصال
الصديق :: يعنى عاجبك حال البلد واللى وصلتله
المواطن الفصيح :: وهو مين السبب غير اللى ناهبنها بقالهم 60 سنة اللى مستحوذين على اراضى البلد دى ومصانعها وشركاتها وكل حاجة فيها تمًا.
الصديق :: يا عم ما هم محبوسين اهم.
المواطن الفصيح :: محبوسين مين .. انت فاكرنى اقصد حسنى ورجالته .. لا دول كانوا ستارة بيستخبوا حواليها العسكر. دول ماسكين كل حاجة فى البلد من قبل الثورة بس كانوا مصدرين لينا البغل واولاده ومعارفه.
الصديق :: يا راجل حرام عليك دول حاربوا فى 73 وخير اجناد الارض.
المواطن الفصيح :: يا عم احنا كده بنعمل من الانسان صنم ونعبده.يعنى باللى عملوه يستحقوا يستعبدونا..مش بقولك احنا جبانات.
الصديق :: مكناش قمنا بالثورة.
المواطن الفصيح :: الثورة ثورة فكر وتغيير افكار..يعنى انت لما بتيجى تزرع محصول جديد بتشيل القديم وتزرع الجديد ولا بتظبط ارضك وتحرتها وترويها وتسنجفها كده وبعدين تزرع المحصول الجديد.
الصديق :: قاله لأ طبعًا احرتها واظبطها.
المواطن الفصيح :: هو ده بقى اللى لازم يحصل..لكن عملنا ايه شيلنا محصول فاسد ومريض ومرضه لسه فى الارض البلد دى يعنى..وزرعنا الجديد ومش على نضافة..شيلنا الوطنى جبنا الاخوان فى الشعب والشورى وادى الدستور وبعديه الرئاسة..شيلنا ستارة وحطينا ستارة..والديب زى ما هو.
الصديق :: طب وايه العمل يعنى؟!
المواطن الفصيح :: العمل ان الشباب ياخدوا الفرصة بقى شبعنا من العواجيز دول جتهم نيلة فى شكلهم العكر..يعنى دلوقتى لما واحد يتخرج من طب ولا هندسة ولا علوم سياسية دى ولا ايتها كلية..ومش يلاقى شغل ولا يلاقى شىء..هيعمل ايه!!! مش عاوزين شبابنا ييأس..اذا كان كنا بنشتمهم ونسبهم ونقول عليهم انهم شباب منيل وبتاع بنات ومش عارف ايه ومفيش شغل ولا قدوة ولا ايتها حاجة..وعملوا الثورة واللى احنا مش قدرنا نعمله..يبقى نسيب لهم الفرصة يشغلوا البلد دى شوية..يعنى حدانا واحد فى البلد خريج اقتصاد وعلوم سياسية..ساب البلد وهج منها من قبل الثورة..ليه ده مش يرجع ويشوف بلده احسن..زويل اللى واخد نوبل لما جه طردوه..فاروق الباز..مجدى يعقوب..البرادعى..كل علماة البلد دى مش بنستفاد منهم والبلاد التانية بتستفاد منهم..بلا قرف يا اخى..والله حال البلد دى ما هينعدل ابدًا..غير لما الشباب دول هما اللى يديروها هما والعلماء بتوع البلد دى.

وجدت نفسى قد وصلت الزراعة بدون ان احس او امل من ذلك الحديث وكنت انوى النزول فى المحطة ايضًا ولكن بلاغة ذلك المواطن الفصيح " الأب الحنون " لفتت نظرى وشدتنى حتى انستنى كل ما يدور حولى.

فيه أمل...بكرة أحلى...طول ما فيه من عينة الفصيح ده

على رزق
2/4/2012

الاثنين، 2 أبريل 2012

ليه الملامة


يا بلدى ليه الملامة ~~ هكون فراشة أو حمامة

وبدون حساسة ولا ندامة ~~ هفضل انا الكمامة

ويبقى الأمل ما دامت الحياة يا بلدى


 على رزق  
1/4/2012